1.  Na malungun do rohangku tu Ho o Debatangki

Ho haposan ni rohangku jana haporusanki.

Sasude na ro tu Ho tongtong do pamonangon Mu.

Jolma si jehehon Ho, natalu do baenon Mu.

2. Pabotohon ma tu au hagiot ni rohaMi

Anso i ihutkononku togu au mamolus i

Na hombar tu giotMi dohot tu hasintonganMu

Ho do hatuaonki dohot arop ni rohangku

3. Ingot ma ale Tuhanku sude denggan basaMi

Dohot asi ni rohaMu na dung tulus i di au

Ulang ingot dosangki, dosa ni haposoonku

Sai ibo ma rohaMi tulus ma pangidoanku.

4. Ho do Tuhan na dumenggan, jana Tuhan na bonar

Mangajarkon tu pardosa angka dalan na tigor

Na toruk marroha i dipiohon tu na sonang

Na lambok marroha i do dioban tu na torang.

5. Sai dumpangan habonaran dohot asi roha i

Sasude na burju roha mangoloi tonaNa i

Tuhan, hara goarMi sesa ma sude dosangku

Hara asi rohaMi masuk au tu ingananMu.

6. Angka na manghabiari Tuhan Debatanta i

Halahi do diajari ro tu hangoluan i

Sonang do tondina i di bagasan hasonangan

Jana pomparanna i sipartohap hasiangan.

7. Hasudungan ni Jahowa do halak na tigor i

Hahomion ni Tuhan tola botoonna i

Sai tongtong do matangki mangaranap tu Tuhanku

Dipalua do patki sian jorgong ni musungku.

8. Na dangol jana tarpunjung tatap ma o Tuhanki

Hum tu Ho do au malungun sai palua tondingki

Ganop ari tamba do hasusaan ni rohangku

Sai palua ma au on ale Tuhan Debatangku.

9. Tatap ma pardangolanku dohot hangoluanki

Sesa ma sude dosangku sai papir ma tondingki

Mur bahat do musungki i ma angka pamurai

Tuhan, tatap au disi, anso ulang saut sangkapna.